GNU gettext er gamalreynd og ágæt leið til að bjóða upp á þýddar og staðfærðar útgáfur af hugbúnaði. Gettext er hægt að finna fyrir flest forritunarmál (t.d. Perl, Python og PHP). Þar er m.a. að finna skipunina ngettext sem finnur ekki eingöngu þýðingu strengs heldur velur hún einnig á milli textastrengja út frá tölu og er notuð til að velja eintölu eða fleirtölu.

printf (ngettext ("deleted %d file", "deleted %d files", n), n);

Þýðingar fyrir textastrengina er að finna í PO-skrám (sem er svo umbreytt í MO-skrár með msgfmt) og hausi þeirrra skráa er einnig að finna skilgreiningu á því hvernig velja eigi rétta tölumynd (nánar tiltekið skilgreining á fleirtölunni eða fleirtölunum fyrir þau mál sem hafa fleiri en eina fleirtölu). Ég hef hinsvegar rekið mig á það að í öllum íslensku PO-skránum sem ég hef skoðað er fleirtöluskilgreining röng, þ.e. skilgreining f. ensku er látin vera óbreytt í skránni þegar hún er þýdd.

Plural-Forms: nplurals=2; plural=n != 1;

Þetta merkir að tölumyndirnar eru tvær og fleirtalan er allt nema talan 1. En þessi skilgreining dugar ekki fyrir íslensku því við tölum t.d. um að Binni hafi keypt 21 vindil en ekki að *Binni hafi keypt 21 vindla.

Plural-Forms: nplurals=2; plural=n%10 != 1 || n%100 == 11;

Þessi skilgreining er hinsvegar rétt fyrir íslensku (n>=0). Hér fá allar tölur sem ekki enda á einum að undanteknum þeim sem enda á ellefu fleirtölumynd. Hægt er að prófa skilgreininguna með einfaldri Perl-skriftu:

#!/usr/bin/perlforeach my $n ( 0 … 23, 100 … 113) { print $n; if( $n % 10 != 1 || $n % 100 == 11) { print " hestar"; } else { print " hestur"; } print ", " if $n != 113;}

Sem gefur eftirfarandi útkomu eins og við viljum:

0 hestar, 1 hestur, 2 hestar, 3 hestar, 4 hestar, 5 hestar, 6 hestar, 7 hestar, 8 hestar, 9 hestar, 10 hestar, 11 hestar, 12 hestar, 13 hestar, 14 hestar, 15 hestar, 16 hestar, 17 hestar, 18 hestar, 19 hestar, 20 hestar, 21 hestur, 22 hestar, 23 hestar, 100 hestar, 101 hestur, 102 hestar, 103 hestar, 104 hestar, 105 hestar, 106 hestar, 107 hestar, 108 hestar, 109 hestar, 110 hestar, 111 hestar, 112 hestar, 113 hestar

Ath. Þessi færsla er einskonar bót á Vefinn. Ég fann ekki þessar upplýsingar og bæti þeim því við hér.

Mauren

21. apríl 2006

Liten?
Jeg?
Langtifra.
Jeg er akkurat stor nok.
Fyller meg selv helt
på langs og på tvers
fra øverst til nederst.
Er du større enn deg selv kanskje?

Inger Hagerup (1905-1985)

15. apríl 2006

Nú fer að líða að því að flutningunum miklu ljúki. Seinastur er annáll.is sem er á leiðinni í þessum rituðum orðum.

12. apríl 2006

RewriteEngine

12. apríl 2006

Ég ákvað að tengja undirlénin við bloggin í stað forsíðunnar í dag og skrifaði til þess nokkur mod_rewrite-skilyrði og reglur. Ég hef áður lítið þurft að nota þann módúl og varð því að lesa mér til. Enda illa séð ef maður er að fikta og valda "Internal Server Error"-villum á vef sem er á-línunni. Svo tekur það alltaf smá tíma að komast inn í stöðuvélaþankaganginn þegar maður er að semja reglulegar segðir. Eitt sem er ekki skýrt í leiðbeiningunum er að maður getur ekki endurritað lénsheitið heldur eingöngu beint á lénið (sem er vel skiljanlegt þegar maður hugsar út í það). Þetta gæti orðið ruglingslegt vegna þess að maður kemst upp með að rita lénsheiti í reglunum en svo eru þau bara hunsuð.

Eftir að hafa gert undirlénin virk þá bætti ég líke við mod_rewrite-reglum til að beina gömlu urlunum fyrir þau blogg sem eru virk á nýju undirlénin. En svo kom í ljós að nauðsynlegt var að yfirfara og laga skapalónin því ekki virtast allstaðar hafa verið notaðar réttar breytur og lénið stundum bara skrifað beint (þetta á sérstaklega við elstu skapalónin). Ég er að verða búinn að yfirfara þau skapalón sem eru í notkun.

Eftir flutninginn hefur furðu lítið komið upp á (sjö níu þrettán). Athugasemdir duttu út í smá tíma vegna villu í PHP eftir uppfærslu. Ég tel mig vera búinn að kippa því í liðinn, en ef ekki þá er alltaf hægt að "niðurfæra" aftur. Stærra vandamál var að ég uppgötvaði að læstar síður, færslur og flokkar var allt algerlega læst svo enginn kæmist inn. Ástæðan fyrir því reyndist vera sú að þegar PHP er keyrt sem CGI en ekki Apache-módúll þá hefur það ekki aðgang að innskráningarupplýsingunum. Mér tókst að leysa það með því að veita kerfinu aðgang að þeim upplýsingum (%{HTTP:Authorization}) með mod_rewrite-skipun. Ansi var nú heppilegt að hafa verið búinn að kynna sér það fyrr um daginn. :)

9. apríl 2006

Það er forvitnilegt að fylgjast með nafnaþjónsupplýsingunum dreifast um Netið. Er núna happs happs hvort ég fæ nýja vefþjóninn eða þann gamla með blogg.is urlinu hérna hjá mér. Ég er meira að segja með hvora útgáfuna í sínum flipanum í Camínó - báðar sóttar með blogg.is urlinu á innan við tíu mínútna bili. En samt má þetta fara að drífa sig að ganga yfir. Ef ég skil hlutina rétt þá ætti þetta ekki að taka lengri tíma en til miðnættis (rúmlega 22.00 að ísl. tíma) því TTL (time to live) stillingin er minnst 24 tímar.

Ps. Jæja, það gekk eftir. Núna eftir sólarhringinn virðist nýi þjóninn svara fyrir allar fyrirspurnir. Þetta gekk merkjanlega hraðar yfir á Íslandi heldur en hérna hjá mér í Noregi.

Blogg.is flutt

9. apríl 2006

Í kvöld flutti ég Blogg.is yfir á nýjan og öflugri vefþjón. Flutningurinn er búinn að vera í rólegum undirbúningi frá mánaðarmótum en að honum hefur aftur á móti verið stefnt lengi. Þjónustan hjá Skýrr var alltaf svo slöpp og dýr að auki. Sem dæmi má nefna að til flytja afritið af vefnum þurfti ég að sækja það yfir HTTP því hvorki sfp né ftp virkuðu. En það tók langan tíma að finna nýja hýsingu sem hentaði enda ekki hlaupið að svona flutningum.

Á meðan nafnþjónsupplýsingarnar seitla um Netið þá má búast við einhverri röskun á þjónustunni á Blogg.is. Ég lokaði fyrir athugasemdir á gamla vefnum og læsti einnig umsjónarkerfinu. Ég veitti þó notendunum aðgang að tímabundinni lausn til að skrifa færslur á nýja vefinn - er að nota hana í þessum rituðum orðum.

Ég gerði smá útlitsbreytingar á forsíðu Blogg.is, aðallega til að notendur áttuðu sig á því að þeir væru á nýja vefnum. Ég held að breytingarnar samanstandi af uþb 10 línum, ekki meira - svo þetta er nánast sama forsíða. Stækkaði letrið smá - enda er maður að eldast og sjónin farin að hraka. Ég tók einnig út yfirlitin á forsíðunni því sumir hafa beðist undan því að vera listaðir þar. Sjálfur hef ég ritað færslur sem ég vildi ekkert að birtist þarna heldur svo ég skil það (hef reyndar beðið í nokkra klukkutíma með að setja titil á þær til að sleppa við það).

En nýjum vefþjóni fylgja nokkrir kostir sem verða nýttir til að gera vefinn betri þegar fram sækir og annir leyfa.

Ps. Annáll.is og þau blogg sem hafa sitt eigið lén verða flutt seinna í mánuðinum. Ég hefði viljað flytja Annál núna í kvöld líka en Norðmennirnir sem sjá um nafnaþjóninn brugðust mér í þeim efnum. Ræði við þá á mánudaginn og þá fylgir Annáll í kjölf Blogg.is.

Pps. Úps! Rakst á fyrsta vandamálið - þarf að gera athugasemdargluggann óvirkan í umsjónarkerfinu þar til ég er búinn að lagfæra það.

Alfræði

6. apríl 2006

Ég verð að játa að Wikipedia.org er orðið ansi gott uppflettirit. Þegar ég var að skoða vefinn fyrir ári síðan þá fann ég lítið athyglisvert (fyrir mig = málvísindi, tungutækni, tölfræði …) en núna er allt önnur hlið uppi á teninginum.

Eitt sem er undarlegt hér í Noregi er að í upphafi hverjar annar þá birtist alfræðiorðabókasölumaður í andyri hugvísindabyggingarinnar Björgvinjarháskóla. Ég ætla að vona að fæstir nýnemar láta plata sig til að kaupa 16. bindi hins Store norske leksikon á raðgreiðslum til fjögurra ára (bara 300 NOK á mánuði). Ég skil reyndar ekki afhverju þessi farandsölumaður fær húsaskjól þarna í andyrinu. Það er víst bannað að vera með auglýsingar og sölumennsku í norskum skólum. Hann minnir reyndar á manninn frá Máli og menningu sem setti upp söluborð andyrinu á jarðhæðinni í Árnagarði í upphafi skólaársins. En hann var þó að selja aðeins merkilegri bækur - sumar jafnvel hluti af skyldulesefni íslenskunema. Svo rámar mig eitthvað í Britaniku-sölumenn á Íslandi en það eru nokkrir áratugir síðan.

Ps. Skrapp í Slettebakken senter í dag (8/4) og sá þá einn svona leksíkonsölumann sem var búinn að koma sér fyrir þar. Það sem var merkilegra var að ég sá að þeir eru að fara að opna Vínmónopolí í Slettebakken senter..

Síðvetur

6. apríl 2006

Mikið vildi ég að þetta veðrakerfi færi að ákveða sig. Eftir leiðindavetur hefur manni í tvígang verið talið í trú um að sumarið sé komið - en nei ekki er það svo gott. Í gær var sól og heitt úti. Ég var kominn í strigaskó og farinn að keyra um með niðurskrúfaðar rúður. Búinn að vera að lækka í ofnunum í íbúðinni stöðugt seinustu vikur. Tók meira að segja sumarsængina út úr skáp. En svo var snjókoma í nótt! Að vísu lofa veðurfréttamennirnir góðu páskaveðri en ég á erfitt með að trúa því þegar ég kíki út um gluggann.